Sahibkarlığın İnkişafı Fondu tərəfindən ayrılan güzəştli kreditlərin həcmi AÇIQLANIB

2023-cü ildə Sahibkarlığın İnkişafı Fondu tərəfindən 3276 investisiya layihəsinin maliyyələşdirilməsi üçün 193,8 milyon manat dəyərində güzəştli kredit ayrılıb.

meqale.com Trend-ə istinadən xəbər verir ki, bu barədə İqtisadiyyat Nazirliyi yanında Sahibkarlığın İnkişafı Fondunun İdarə Heyətinin sədri Osman Xaliyev 2023-cü ildəki fəaliyyətin yekunlarına həsr olunmuş mətbuat konfransında deyib.

Onun sözlərinə görə, investisiya layihələrinin ümumi dəyəri 459,9 milyon manatdır.

"Bu kreditlər sayəsində 3 mindən çox yeni iş yeri açılıb. Ayrılan kreditlərin 46,4 faizi kənd təsərrüfatı məhsullarının istehsalına, 43 faizi sənaye məhsullarının istehsalı və emalına, 5,5 faizi xidmət sahəsinə, 4,5 faizi isə turizmin inkişafı üzrə layihələrə yönəlib. Güzəştli kreditlərin 72 faizi bölgələrə, 28 faizi isə Bakı və Abşeron iqtisadi rayonuna yönəlib", - o deyib.

O.Xaliyev 2023-cü ildə kreditlərin orta ölçüsünün 59,2 min manat olduğunu qeyd edib.

Xatırladaq ki, 2022-ci ildə Sahibkarlığın İnkişafı Fondu tərəfindən Azərbaycanda sahibkarlar üçün 145,9 milyon manat dəyərində kredit ayırıb.