Bakıda məktəbin yaxınlığında narkotik satan şəxs ƏLƏ KEÇDİ - YENİLƏNİB - FOTO

Bakının Nəsimi rayonunda yerləşən orta məktəblərdən birinin yaxınlığında narkotik maddələrin satışı iddiaları ilə bağlı daxil olan məlumatlar nəzarətə götürülərək araşdırılıb.

DİN-in mətbuat xidmətinin əməkdaşı, polis mayoru Anar Qafarov bildirib ki, Nəsimi RPİ əməkdaşları tərəfindən həyata keçirilən tədbir nəticəsində həmin şəxs, paytaxt sakini 1987-ci il təvəllüdlü Zaur Hacıyev müəyyən olunaraq saxlanılıb.

Onun üzərindən külli miqdarda 102 qram narkotik vasitə heroin aşkar edilib.

Araşdırma zamanı Z.Hacıyevin narkotik maddələrin satışını təşkil etməklə bərabər aludəçisi olduğu, həmçinin onunla birlikdə görüntülənən şəxslərin məktəb şagirdləri yox, narkotik vasitə istifadəçiləri olduqları müəyyən edilib.

Şübhəli şəxs barəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar davam etdirilir.

--------

17:53

Bakıda 44 saylı orta məktəbin ərazisində şagirdlərə narkotik maddənin satılması iddia edilib.

Bu barədə BAKU.WS-in "qaynar xətti"nə məlumat daxil olub.

İddiaya görə, bir neçə məktəbliyə naməlum şəxs tərəfindən "patı" satılıb.

Məsələ ilə bağlı DİN mətbuat xidmətinin əməkdaşı Nurlan Əliyev BAKU.WS-in sorğusuna cavab bildirib ki, videogörüntülərlə bağlı araşdırma aparılır:

"İddialar araşdırma predmetidir. Nəticəsi barədə əlavə məlumat veriləcək".