"Bir kəlmə də danışmır" - Xanımı Aşıq Əhliman haqda

"Əhliman müəllim demək olar ki, danışmır, bir kəlmə də kəsmir. Bəzən ola bilər ki, bizimlə bir neçə söz danışsın. Amma çox qısa. Nitqində problemlər var. Yaddaşındakı problemlər də özünü büruzə verir. Bəzən insanları tanıyır, bəzən də yox. Gərək bir neçə dəfə deyəsən ki, filankəsdir, yadına düşsün, tanısın. Müalicəsi yoxdur, Allah özü qorusun. Bütün günü yanında oluruq. Onu bir saniyə belə olsun tək buraxmırıq".

meqale.com xəbər verir ki, bunu moderator.az-a açıqlamasında Əməkdar Mədəniyyət işçisi, fəlsəfə doktoru, dosent Aşıq Əhliman Rəhimovun həyat yoldaşı Aybəniz Salmanova deyib.

"Bir neçə televiziyadan gəlib çəkmək istədilər. Çəksələr belə, danışmayacaq. Ona görə də razılıq vermədik. O hər zaman efirlərdə olub, bayramlarda çıxışlar edib. Mahnıları dillər əzbəridir. İstəməzdik ki, onu tamaşaçılar da bu vəziyyətdə görsün. Ona görə də çəkilişlərə icazə vermirik. Qoy elə tamaşaçıların yaddaşında əvvəlki aşıq Əhliman kimi qalsın. Onun bu vəziyyəti ailəsini də, dostlarını da çox üzür. Bizim əlimizdən duadan başqa heç nə gəlmir. Kaş yenə də sazı əlinə götürüb, ifa edə biləydi.. Kaş..." deyə, sənətkarın xanımı bildirib.