"Sabah" əzmkar qələbə ilə növbəti mərhələyə vəsiqə qazanıb - YENİLƏNDİ

"Sabah" UEFA Konfrans Liqasında III təsnifat mərhələsinə yüksəlib.

Bakı klubu buna II raundun cavab oyununda Bakıda Latviyanın RFŞ komandasını 2:1 hesabı ilə məğlub etməklə nail olub. İlk qarşılaşmada rəqibinə 2 cavabsız qolla qalib gələn Murad Musayevin baş məşqçi olduğu kollektiv iki görüşün nəticəsinə əsasən adını növbəti mərhələyə yazdırıb.

Cavab oyununun ilk hissəsində qapılara top vurulmayıb. Əvəzində 34-cü dəqiqədə qonaqların hücumçusu Andrey İliç ikinci sarı vərəqəni alaraq meydandan qovulub.

Hesab isə 67-ci dəqiqədə açılıb. Yanus İkauniyeks qonaqları önə çıxarıb. Buna baxmayaraq, "Sabah" məğlubiyyətdən xilas ola bilib. Cəmi 10 dəqiqə sonra fərqlənən Coy Lens Mikels tarazlığı bərpa edib. 90+4-cü dəqiqədə isə Emanuel Apeh yekun hesabı müəyyənləşdirib.

Qeyd edək ki, "Sabah" III təsnifat mərhələsində Serbiya "Partizan"ı ilə qarşılaşacaq. Bu raundun oyunları 10-17 avqustda keçiriləcək.

--------

21:43

Bakıda "Sabah" və Latviyanın RFŞ kollektivləri arasında keçirilən UEFA Konfrans Liqasının II təsnifat mərhələsinin cavab oyununda 2-ci qol vurulub.

meqale.com xəbər verir ki, Bakı klubunun hücumçusu Coy Lens Mikels 77-ci dəqiqədə hesabı bərabərləşdirib.

--------

20:58

Bakıda "Sabah" və Latviyanın RFŞ kollektivləri arasında keçirilən UEFA Konfrans Liqasının II təsnifat mərhələsinin cavab oyununda ilk hissə başa çatıb.

meqale.com xəbər verir ki, komandalar fasiləyə qolsuz heç-heçə ilə yollanıblar.

34-cü dəqiqədə qonaqlar azlıqda qalıblar. Andrey İliç ikinci sarı vərəqəni alaraq meydandan qovulub.

-------

20:15

Bakıda "Sabah" və Latviyanın RFŞ komandaları arasında UEFA Konfrans Liqasının II təsnifat mərhələsinin cavab oyunu start götürüb.

meqale.com xəbər verir ki, "Bank Respublika Arena"da keçirilən qarşılaşma saat 20:00-da başlayıb.

Görüşü isveçrəli FİFA referisi Fedayi San idarə edir.

Qeyd edək ki, ilk matçda "Sabah" 2:0 hesablı qələbə qazanıb.