Nəsimi və Səbail rayonunun seçiciləri fəallıq nümayiş etdirirlər - Məntəqə sədri

Bakı şəhərinin Nəsimi və Səbail rayonunun seçiciləri yüksək fəallıq nümayiş etdirirlər.

meqale.com xəbər verir ki, bunu Trend-ə 160 saylı orta məktəbdə təşkil edilən 23 saylı Nəsimi - Səbail dairəsinin 31 saylı məntəqəsinin sədri Faina Ələkbərova deyib.

"Seçicilər çox fəaldır. Məntəqəmizdə səs verməli olan seçicilərin artıq 60 faizdən çoxu səs verib. Çox sayda yaşlı insanlar, cavanlar seçkilərdə iştirak edirlər. Onların səsvermə hüququndan istifadə etmısi üçün bütün şərait yaradılıb", - deyə o bildirib.

Qeyd edək ki, bu gün Azərbaycanda Prezident seçkiləri keçirilir. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb. Yanvarın 9-da prezidentliyə namizədliyin qeydə alınması başa çatıb.

Seçici siyahılarında 6 milyon 478 min 623 seçicinin adı var. Onlar ölkə üzrə 6537 məntəqədə səs verəcəklər.

Seçkiləri izləmək üçün indiyə qədər 90 372 müşahidəçi qeydə alınıb. Onların 790 nəfəri 72 beynəlxalq təşkilatı təmsil edən müşahidəçilərdir. Bu müşahidəçilər 89 ölkədəndir.

Seçkilər bütün Azərbaycan ərazisini, o cümlədən, işğaldan azad edilmiş əraziləri əhatə edir. İşğaldan azad edilən ərazilərdə 26 seçki məntəqəsi yaradılıb.

Xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi yaradılıb. Həmin məntəqələrdə 23 mindən artıq seçici səsvermə hüququndan istifadə edəcək.

Seçkilərdə 190 beynəlxalq media qurumu iştirak edir. Onların 216 təmsilçisi beynəlxalq müşahidəçi kimi qeydə alınıb.