Rusiya bu istiqamətdə "həlledici döyüşə" HAZIRLAŞIR

ABŞ-ın Müharibə Araşdırmaları İnstitutu (ISW) sentyabrın 5-6-da Ukrayna cəbhəsindəki vəziyyətlə bağlı növbəti hesabatını açıqlayıb.

meqale.com xəbər verir ki, sənəddə xüsusilə Xarkov və Donetsk vilayətlərində rus qoşunlarının fəaliyyətindən bəhs olunur.

Məlumata görə, sentyabrın 6-da Rusiya ordusu Xarkov vilayətinin şimalında hücumlarını davam etdirsə də, təsdiqlənmiş irəliləyiş əldə edə bilməyib. Bununla belə, geolokasiya materialları rusların Kupyanskın şimal-qərbinə daxil olduğunu göstərir.

Liman istiqamətində isə hər iki tərəfin irəliləyiş cəhdləri qeydə alınıb. Sentyabrın 5-də yayılan görüntülər Ukrayna ordusunun Zareçnının qərbində müəyyən uğur qazandığını təsdiqləyir. Eyni zamanda rus qüvvələri Limanın şimal-qərbinə doğru hərəkət edərək Netrius çayının sol sahilinə çatıb.

ISW bildirir ki, sentyabrın 6-da Rusiya ordusu Seversk və Pokrovsk istiqamətlərində də hücuma keçib. Geolokasiya videolarına əsasən, Pokrovskdan şimal-şərqdə yerləşən Mirolyubovka ətrafında rusların kiçik irəliləyişləri qeydə alınıb.

Novopavlovka və Zaporojye vilayətinin şərq istiqamətlərində də hücumlar davam etsə də, cəbhə xəttində dəyişiklik olmayıb. Həmçinin Xerson istiqamətində sentyabrın 5-6-da məhdud hücumlar təşkil edilsə də, nəticəsiz qalıb.

Mənbələrin məlumatına görə, Rusiya komandanlığı təcrübəli dəniz birləşmələrini Pokrovska yönləndirib və taktikasında dəyişiklik edib. Qüvvələr tək-tək və ya kiçik qruplar halında şəhərə daxil olmağa çalışır.

Ukrayna Hava Hücum Qüvvələrinin nümayəndələri bildirirlər ki, Moskva ordusu Pokrovsk istiqamətində "həlledici irəliləyiş" planlaşdırır.