Şabrandan Bakıya: Leyla Khazary Art Gallery-də qədim sənət və milli irs - FOTO

Bakıda Leyla Khazary Art Gallery Müasir İncəsənət Qalereyasında Şabranda keçirilən azərbaycanlı rəssamların bir həftəlik art-simpoziumuna həsr olunmuş "İrsin izi ilə" sərgisi keçirilib. Layihə Leyla Khazary Art Qallery və Shabran Wellbeing Resort tərəfindən təşkil olunub

Rəssamlar Eldar Babazadə, Mir Azər Abdullayev, Erkin Ələkbərli, Əli Məhərrəm, Emin Əsgərov, Röya Həsən, Anar Hüseynzadə, Elşən Karaca, Elnur Mahmudov, Cavid Məmmədov, Təranə Seyid və Rauf Şamilzadə yeni əsərlərini simpozium zamanı demək olar ki, onlayn formatda yaradıblar. Bu rəngarəng əsərlər ekspozisiyanın bəzəyinə çevrildi.

Leyla Khazary Art Gallery-nin rəhbəri Leyla Xəzəri, "Azərbaycan Mədəni İrs Sənətkarlığına Dəstək və Kreativ Sənaye" İB sədri və "Atəşgah" İncəsənət Mərkəzinin təsisçisi-rəhbəri Aytən Həsənova, Shabran Wellbeing Resort art-direktoru Arif İbadullayev, Dövlət Mədəniyyət və İncəsənət Universitetinin Dizayn kafedrasının müəllimi Mir Azər Abdullayev çıxış ediblər.

Layihənin Azərbaycan xalqının zəngin milli irsinin, ənənələrinin və qədim sənət nümunələrinin tanıdılması işində əhəmiyyəti qeyd olunub. Qədim sənət formalarının müasir sənətkarların yaratdığı yeni rəsmlərə çevrilməsi əsrlər arasında bir növ körpülərin yaranmasına, milli irsin harmoniyasına və birliyinə və müasir rəssamlığa səbəb olur. Eyni zamanda, "İrsin izi ilə"  (birincisi 2022-ci ildə keçirilib) layihəsi də Azərbaycanın turizm potensialına və mənzərəli yerlərinə diqqətin artırılmasına yönəlib.

Layihə iştirakçılarına xüsusi diplomlar təqdim olunub.